ربع دينار

*

يحيا

يا وطني الجديد

با حليبها

رد علي

لماذا الفطام؟

 

لذا عفواً

عن لهوي

بعد الوليد

بربع الحديد

 

إما حصان

إما رقم

 

إما رقم

إما حصان.

من نص (عفواً)/ زكريا العنقودي

___________________________________

 

في من يقول يا حسره على الربع الجنيه، هذاك، الاحمر. وهو قصده الوقت، لأن ربع الجنيه الاحمر هذاك الوقت كان يدير حوسه في السوق.

ربع دينار 1

الموضوع مش موضع الربع جنيه، الموضوع أكبر من هكي، نتفكر زمان كانت الخمسة قروش تجيب في حارة حلوة (طوفي)، والـ15 قرش نص ومشروب من مقصف المدرسة (مدرسة الفيحاء)، وكان في حلوة قرشين، حلوة زي المصاصة. وكان في القرش، والمليم تمله.

إيه، لحقت عالقرش والقرشين، وكنا نحسبوا بيهم في درس الحساب، بتاع الابتدائي.. كتاب كبير، وحروفه كبار. وفيه الدينار يساوي 1000 درهم، نتفكر في واحد زمان مزق الدينار من الكتاب ومشى بيه للمقصف.. وواحد تاني دار روحة فالح مسى للمقصف بفلوس بنك الحظ.. ما علينا.

ربع دينار 5

الحكاية إن الليبيين ليهم قصة غريبة مع الفئات الصغير للنقود، مع الوقت بدت تختفي، اختفى المليم والخمسه مليم، وبعدها القرش والقرشين، وبعدها الخمسة قروش والعشرة قروش، خاصة وإن الربع والخمسين صدرت في عملات ورقية.. في عداء غريب مع فلوس النحاس/ الحديد.

– شنو حديد يقعد يشكشك في جيبي.

– باهي وين تبيني نحطهم، تي يبوا دزدان خاص بيهم.

يعني وحدا الفلوس الصغيرة اختفت، حتى بعد ما الدولة رجعت الخمسة قروش والعشرة قروش، وزادت الربع دينار والنص دينار في إصدارات معدنية، تفتقت ذهنية الليبي عن جمع عشرتين وخمس بلصقة الفلوس، باش يولي في ربع واتي.. يعني كليبيين أسقطنا من تعاملاتنا المالية الخمسة والعشرة قروش.

ربع دينار 2

ربع دينار 3

منو الخاسر؟

طبعاً نحن الخاسرين!!!

كيف؟

شوف:

لو فرضنا إن في صاحب دكان شاري سلعة ما، وحسب سعر القصعة ولقاها تطلع بـ12 قرش للقطعة. فالمفترض إنه يبيعها بـ20 قرش كحد أقصى بمربح 60%.. لكن لأنه عارف ومتيقن إن السوق والمواطن مستكرد الخمسة والعشرة فيبيع القطعة بـ25 قرش (ربع دينار) بمربح 208%.. وبالمناسبة هذه حقيقة وحسبة من واقع الحال.

وشوفوا الأسعار كلها تعتمد الربع، يعني: دينار وربع، ودينار ونص، دينار و75، وهكذا.. يعني كلها تمشي بالربع، وشوف قداش في ربع زايد، وخمسات قروش تمشي في الفاضي لجيب التاجرـ يعني بحسبة تلقى إن 20% من مرتبك تقريباً تمشي في الفروقات اللي ضيعناها مع تضييع القرشين والخمسة قروش والعشرة.

بعدين قولولي: أما أقوى اقتصاد، ليبيا اللي أصغر وحدة عملة سوق فيها ربع دينار، ولا الدول اللي أصغر عمله فيها السنت اللي يقابل القرش عندنا؟. يعني هما غافلين عن الحكاية، ولا هما فاهمين صح؟ ولا شنو؟!!!

___________________________

طبعاً الصور من النت.

4 آراء على ”ربع دينار

  1. أنيس الليبيين يقول:

    لاحظ ان اسعارهم أغلبها تلقاها 7.99$ وهذا دليل انهم واعيين لقيمة القرش

  2. SeRaJ يقول:

    ولك في تونس الشقيقة خير متال !!

    تركب في تاكسي بعد مشوار تقوله كم حسابك ،، يجاوب 3750 ! يعني 3 دينار “3000 قرش” و700 قرش و50 درهم ،، 🙂 صدقت ما غافلين عن الحكاية، ولا هما فاهمين صح؟ 🙂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.